കയറട്ടങ്ങനെ കയറട്ടെ

കയറ്റം കയറുന്ന കാര്യമല്ല. നമ്മുടെ നിത്യ ജീവിതത്തിന്‍റെ കാര്യമാണ്. ഇങ്ങനെ സാധന വിലകള്‍ കയറിയാല്‍ എന്തായിത്തീരും ജീവിതം. സര്‍ക്കാര്‍ ജോലിക്കാര്‍ രക്ഷപെട്ടു. അവരുടെ ശംപളം വന്‍തോതില്‍ കൂടാന്‍ പോകുന്നു. സാധാരണക്കാരന്‍ എന്തു ചെയ്യും. ഇങ്ങനെ പോയാല്‍ നാട്ടില്‍ അരാജകത്വം നടമാടുമല്ലോ. ഉള്ളിക്ക് വില കൂടിയ കാരണത്താല്‍ ഒരു സംസ്ഥാനത്തിലെ ഭരണം പോയ നാടാണ് ഇന്ത്യയെന്ന് രാഷ്ട്രീയക്കാര്‍ മനസിലാക്കേണ്ടതാണ്.

വാഗമണും പിന്നെ ഞാനും

ഇത്രയും അടുത്ത് ഇതുപോലെ മനോഹരമായ ഒരു സ്ഥലമുണ്ടായിട്ടും ഇന്നു വരെ പോകാന്‍ സാധിക്കാഞ്ഞത് മണ്ടത്തരമായിപ്പോയി എന്ന് ഇന്ന് മനസിലായി. കാരണം ഇന്നാണ് ഞാന്‍ വാഗമണില്‍ പോയത്. പ്രകൃതി സൗന്ദര്യം വഴിഞ്ഞൊഴുകുന്ന മനോഹരമായ ഒരു പോയിന്‍റാണ് വാഗമണ്‍ എന്നതില്‍ തര്‍ക്കമില്ല. പ്രിയരേ, നിങ്ങളില്‍ പോകാത്തവര്‍ ഇവിടെയൊന്ന് പോകണം. എങ്കില്‍ മാത്രമേ ആ സൗന്ദര്യം നിങ്ങള്‍ക്ക് മനസിലാകത്തുള്ളൂ.

മനോഹരിത എന്ന് പറഞ്ഞാല്‍ തീര്‍ച്ചയായും അത് കലര്‍പ്പില്ലാത്ത പ്രകൃതി സൗന്ദര്യം ആകണം. ആയത് ധാരാളമായി അനുഗ്രഹിച്ച ഒരു സ്ഥലമാണിവിടം എന്നതാണ് സത്യം. പൈന്‍ മരത്തോട്ടവും, അള്ളാപ്പാറയും, ആത്മഹത്യാ മുനന്പും ഇവിടത്തെ സൗന്ദര്യദായകങ്ങളാണ്. ഒന്ന് പോയാല്‍ വീണ്ടും പോകാന്‍ തോന്നും.

ഈ പാറയുടെ മുകളില്‍ കയറാന്‍ ആര്‍ക്കാണ് തോന്നാതിരിക്കുക. സൂയിസൈഡ് പോയന്‍റിലേക്ക് പോകുന്ന വഴിയിലുള്ള മൊട്ടക്കുന്നുകളാണിവ. ഇതിന്‍റെ മുകളില്‍ കയറിയിറങ്ങി വരുന്പോള്‍ കൊളസ്ട്രോള്‍ കുറയുമെന്നുള്ള കാര്യത്തില്‍ സംശയമില്ല. ഉച്ച കഴിഞ്ഞപ്പോള്‍ നല്ല മഴ. സ്വാഭാവികമായി ഉണ്ടായിരുന്ന തണുപ്പിന് അപ്പോള്‍ ശക്തി കൂടി. പെട്ടെന്ന് കോടമഞ്ഞിന്‍റെ ആക്രമണം കൂടാന്‍ തുടങ്ങി. തൊട്ടു മുന്നില്‍ നില്‍ക്കുന്ന ആളെപോലും കാണാന്‍ പറ്റാതാകുന്ന അവസ്ഥ സംജാതമായി. മലയിറങ്ങിയത് രണ്ടും കല്പിച്ചാണ്. കാരണം എതിരേ വരുന്ന വാഹനങ്ങളെ കാണാന്‍ സാധിക്കണമല്ലോ. തീക്കോയി എത്തിയപ്പഴല്ലേ അത്ഭുതം. മഴയുമില്ല മഞ്ഞുമില്ല. നന്നായി ചൂടെടുക്കുവാനും തുടങ്ങി. അപ്പോഴാണ് വാഗമണ്‍ കുന്നുകളില്‍ നിന്നും ഇറങ്ങി വന്നതിന്‍റെ ന്ഷ്ട ബോധം തോന്നിയത്.

തൊട്ടടുത്തുള്ള ടൂറിസ്റ്റ് പ്രദേശങ്ങള്‍ അവഗണിച്ച് ഊട്ടിയിലേക്കും കൊടൈക്കനാലിലേക്കും പോകുന്ന നമ്മള്‍ സത്യത്തില്‍ മണ്ടന്‍മാര്‍ തന്നെ.

സ്ഫോടനങ്ങള്‍

രാജ്യത്തെ നടുക്കുന്ന കുംഭകോണങ്ങള്‍ പുറത്ത് വരുന്പോള്‍ എവിടെയെങ്കിലും ബോംബ് പൊട്ടുന്ന ആ പതിവ് ഇത്തവണയും തെറ്റിയില്ല. സ്പെക്ട്രം അഴിമതി മുഖ്യധാരാ രാഷ്ട്രീയപ്രസ്ഥാനങ്ങളുടെ അടപ്പൂരും എന്ന ഘട്ടം വന്നപ്പോള്‍ ഇതാ വാരണാസിയില്‍ ബോംബ് സ്ഫോടനം. പതിവു പോലെ അപ്പോള്‍ തന്നെ ഇന്ത്യന്‍ മുജാഹിദീന്‍ ഏറ്റെടുത്തു. മാധ്യമങ്ങള്‍ക്ക് അവര്‍ മെയിലയച്ചു. മെയിലിന്‍റെ ഉറവിടം തേടിച്ചെന്ന പൊലീസിന് ഉദ്ദേശിച്ച സമുദായക്കാരെ കാണാന്‍ കഴിഞ്ഞില്ല. അപ്പോള്‍ കണ്ടെത്തിയവര്‍ നിരപരാധികളായി. അവരുടെ വൈഫൈ കണക്ഷന്‍ ഹാക്ക് ചെയ്ത് മെയില്‍ അയച്ചതാണത്രെ. പൊലീസ് കുറ്റവാളികളെക്കുറിച്ച് മാധ്യമങ്ങള്‍ക്ക് വാര്‍ത്ത കൊടുത്തു. ഏതോ രണ്ട് കൊടും ഭീകരര്‍. പറഞ്ഞ് വന്നപ്പോള്‍ അവര്‍ രണ്ടുപേരും മുന്പ് നടന്ന എല്ലാ സ്ഫോടനങ്ങളുടെയും പുറകിലുണ്ട്. ബട്‍ല ഹൗസ് ഏറ്റുമുട്ടലിലും അവരുണ്ടത്രെ.
ആ നടക്കട്ടെ പുകിലുകള്‍. എന്തും വെള്ളം തൊടാതെ വിഴുങ്ങുന്ന ഒരു സമൂഹമുണ്ടെങ്കില്‍ ആടിനെ പട്ടിയാക്കാം. മെയില്‍ അയച്ചവരെക്കുറിച്ച് ഒന്നും അന്വേഷിക്കുന്നില്ലേ? പ്രത്യേക സമുദായക്കാരാണെങ്കില്‍ വൈഫൈ നുഴഞ്ഞു കേറ്റം കെട്ടുകഥയാകുമായിരുന്നു. പാവങ്ങള്‍ ജാമ്യം കിട്ടാതെ ഉഴറിയേനെ. മുന്പ് ഒരു മെയില്‍ അയച്ച കെന്നത്ത് വുഡ് എന്നൊരാളെ ഇന്‍റലിജന്‍സ് രാക്കുരാമാനം രക്ഷപെടുത്തിയ സംഭവം ഓര്‍ക്കുക. ആയതില്‍ പരേതനായ ഹേമന്ദ് കര്‍ക്കരെയുടെ അഭിപ്രായം ഓര്‍ക്കുക.
ഓര്‍ക്കാന്‍ ഇവിടെ ആര്‍ക്കു നേരം അല്ലേ. ഓര്‍മ്മകളുണ്ടായിരുന്നെങ്കില്‍ ഈ രാജ്യത്തിന് ഈ ഗതി വരുമായിരുന്നോ.

നീരാ റാഡിയ എന്ന മഹതി

ഓരോ കാലങ്ങളിലും ഓരോ യുഗങ്ങളിലും അവതാരങ്ങള്‍ പിറക്കാറുണ്ട്. ഇതാ ഈ യുഗത്തിലെ പുതിയ അവതാരം. ഈ അവതാരം കുറച്ചു കൂടി ശക്തയാണ്. ഫാരിസ് അബൂഹക്കറിനെ പോലെയോ സാന്‍റിയാഗോ മാര്‍ട്ടിനെപ്പോലെയോ അല്ല. ഇത് അവതരിച്ചിരിക്കുന്നത് സാക്ഷാല്‍ കേന്ദ്രത്തിലാണ്. കേന്ദ്രത്തിലെ എല്ലാ അവതാരങ്ങളെക്കാളും ശക്തമാണ് ഈ അവതാരം. നരസിംഹത്തില്‍ പറയും പോലെ എല്ലാ അവതാരങ്ങളുടെയും ശക്തി ഒന്നിച്ചാവാഹിച്ചതാണ് ഇത്.
    ഇന്ദ്രപ്രസ്ഥത്തില്‍ സാക്ഷാല്‍ സോണിയയെക്കാളും ശക്ത ഇവരാണത്രേ. ഫോബ്സ് മാസിക ശക്തരായ വനിതകളെ തിരഞ്ഞെടുത്തപ്പോള്‍ ഇവരെ തഴഞ്ഞത് കഷ്ടമായിപ്പോയി എന്നാണ് എന്‍റെ പക്ഷം. സാരമില്ല ഇനിയും വരുമല്ലോ അവസരം.
    അഴിമതിയുടെ കണക്കുകള്‍ കേള്‍ക്കുന്പോള്‍ നമുക്ക് എന്താണ് തല ചുറ്റാത്തത് എന്നാണ് എന്‍റെ ചോദ്യം. വെറുതേ ഒന്ന് സങ്കല്‍പ്പിക്കുവാന്‍ നോക്കി. എത്ര വരും പതിനേഴായിരം കോടി. ഞാന്‍ വിചാരിച്ചത് ഒരു മുറിയില്‍ ഒതുങ്ങും എന്നായിരുന്നു. സാധിക്കില്ല എന്നതാണ് സത്യം. ഒരു വലിയ കണ്ടയ്നറിനകത്ത് ആയിരത്തിന്‍റെ നോട്ടുകള്‍ നിറച്ചാലും പിന്നെയും മിച്ചം കാണുമത്രെ. രാജ്യത്തിന്‍റെ മൊത്തം കടം തീര്‍ക്കാന്‍ ഇത് മതിയായിരുന്നു. പക്ഷേ ഈ നശിച്ച രാഷ്ട്രീയം ഇതൊന്നു സമ്മതിക്കണ്ടേ. രാജ്യത്തെ വിറ്റിട്ടാണെങ്കിലും ഇവന്‍മാര്‍ക്കൊക്കെ സുഖിച്ചാല്‍ മതി. ഇക്കാര്യത്തില്‍ നമ്മുടെ രാജ്യ സ്നേഹി പാര്‍ട്ടിയും മോശമല്ല എന്നാണ് അറിയുവാന്‍ സാധിച്ചത്. അവരുടെ വികസനത്തിന്‍റെ ആചാര്യനായ ഒരു മോഡിയുടെ കൈകളും ഇതില്‍ ഉണ്ടെന്നാണ് കേള്‍ക്കുന്നത്. ആയമ്മയെ സമ്മതിക്കണം, നമ്മുടെ നീരചേച്ചിയെ ആണുദ്ദേശിച്ചത്. ഷാജി കൈലാസിന്‍റെ സിനിമകളില്‍ ചില മേഡങ്ങളെ അവതരിപ്പിക്കുന്പോള്‍ ഇച്ചിരി കടന്നു പോയില്ലേയെന്ന് ആശങ്കിക്കാറുണ്ടായിരുന്നു. എന്നാല്‍ ഈ ചേച്ചിയെക്കുറിച്ച് വായിച്ചു തുടങ്ങിയപ്പോള്‍ അതൊന്നും ഒന്നുമല്ല എന്ന് മനസിലായി.
               എന്നാലും ഇതിനുമ്മാത്രം കോടികള്‍ ഈ വന്പന്‍ കോര്‍പ്പറേറ്റന്മാര്‍ ആര്‍ക്കു വേണ്ടിയാണോ ഉണ്ടാക്കി കൂട്ടുന്നത്. ഇവനൊക്കെ വയര്‍ നിറഞ്ഞാല്‍ പിന്നെ ഭക്ഷിക്കുവാന്‍ സാധിക്കുമോ. കട്ടിലിന് എത്ര വലിപ്പം കൂട്ടിയാലും ഉറങ്ങുന്നത് ഒരല്പം സ്ഥലത്തല്ലേ സാധിക്കുക. മരിച്ചാല്‍ ആറടി മണ്ണല്ലേ വേണ്ടൂ. പിന്നെയും ആര്‍ക്കു വേണ്ടിയാണോ ഈ തത്രപ്പാട്.
          എനിക്കറിയാവുന്ന ഒരാള്‍ കഴിഞ്ഞ ദിവസം ഗള്‍ഫില്‍ വെച്ച് ഒരു ആക്സിഡന്‍റില്‍ മരിച്ചു. അവന്‍ 45 ലക്ഷം രൂപാ ചിലവ് ചെയ്ത് ഒരു വീട് പണിയിച്ചു. ഈ വരുന്ന രണ്ടാം തീയതി കയറിത്താമസിക്കാന്‍ തീരുമാനിച്ചു. പക്ഷേ എന്തായി വിധി. അതി ദാരുണമായി ടിയാന്‍ റോഡാക്സിഡന്‍റില്‍ കൊല്ലപ്പെടുന്നു. മനുഷ്യന്‍ എന്തിനെല്ലാം വേണ്ടി ഓടിയാലും ദൈവം വിധി തന്നില്ലെങ്കില്‍ ആ ഓട്ടം കൊണ്ട് എന്ത് നേട്ടം.
           ഇത് വായിക്കുന്ന പ്രിയരേ ധനം കുന്നുകൂട്ടുന്നതില്‍ യാതൊരു അര്‍ത്ഥവും ഇല്ല. അത് അല്‍പമെങ്കിലും സഹജീവികള്‍ക്കായി ചിലവഴിക്കുന്നതില്‍ ആനന്ദം കണ്ടെത്തുക. നമ്മുടെ ജീവിതത്തില്‍ അതൊരു സന്ദോഷമാകും.

തിരഞ്ഞെടുപ്പ്

ഒരു തിരഞ്ഞെടുപ്പ് മാമാങ്കം കൂടി അവസാനിച്ചു. ആരാണ് ജയിച്ചത്‌. ആരാണ് തോറ്റത്. അഞ്ച് വര്‍ഷം മുന്പ് ആരുടെ ഭരണത്തെ തൂത്തെറിയാന്‍ വേണ്ടി കേരള ജനത ഒന്നിച്ചോ, ഇന്ന് അവരുടെ ഭരണത്തെ തിരിച്ചു കൊണ്ടു വരാന്‍ വേണ്ടി ശ്രമിക്കുന്നു. ഇതാണ് നമ്മുടെ ദുര്യോഗം. നമുക്ക് ഈ രാഷ്ട്രീയ പ്രസ്ഥാനങ്ങളില്‍ നിന്നും രക്ഷയില്ലായെന്നാണ് ഇവ സൂചിപ്പിക്കുന്നത്. എന്നെങ്കിലും ഇതിന് മാറ്റം വരും എന്ന് ആഗ്രഹിക്കുന്നത് മലര്‍പ്പൊടിക്കാരന്‍റെ സ്വപ്നം പോലെയാകുന്നു.

രാഷ്ട്രീയമേ രക്ഷതു

എന്നാലും ഈ എംപി മാരെ സമ്മതിക്കണം. ഇപ്പം തന്നെ ഇവരുടെ വരുമാനം നമുക്ക് സങ്കല്‍പ്പിക്കാന്‍ പറ്റാത്ത വിധമാണ്. ഇനി അത് കൂട്ടാന്‍ വേണ്ടി പുതിയ ബില്ല് അവതരിപ്പിക്കുന്നു. കാണുന്പോള്‍ എത്ര നിസ്സാരം. പന്ത്രണ്ടായിരം രൂപായില്‍ നിന്നും എണ്‍പതിനായിരം ആകുന്നു. പാവങ്ങള്‍ ഇങ്ങനെയെങ്കിലും ഒന്നു വര്‍ദ്ധിപ്പിക്കട്ടെ എന്ന് ചിന്തിക്കും മുന്പ് ചില കണക്കുകള്‍ കാണുക. ശമ്പളം 12000 തന്നെ. TA, DA തുടങ്ങിയവയും ബാക്കി വരുമാനങ്ങളും കൂട്ടുമ്പോള്‍ രണ്ടര ലക്ഷത്തിനു മേല്‍ വരുന്നു വരുമാനം. ഇപ്പോള്‍ എണ്‍പതിനായിരം ആകുമ്പോള്‍ മൊത്തം വരുമാനം സങ്കല്‍പ്പിക്കാന്‍ സാധിക്കുമോ. ഇതാണെങ്കില്‍ ഒരു എതിര്‍പ്പുമില്ലാതെ പാസ്സാകും. ഈ നാട്ടിലെ ജനങ്ങളെ സമ്മതിക്കണം.

ചീറ്റിപ്പോയ ലോകകപ്പ്

കപ്പിനും ചുണ്ടിനും ഇടയില്‍ എത്ര അവസരങ്ങള്‍, ഇതെല്ലാം നഷ്ടപ്പെടുത്തിക്കൊണ്ട് വീണ്ടും ഇന്ത്യന്‍ കടുവകള്‍ ചമ്മി നാറി തിരിച്ചെത്തി. എന്തൊക്കെ ബഹളമായിരുന്നു. മലപ്പുറം കത്തി, ധോണി കുന്തം, തുടങ്ങിയവരെല്ലാം ശവമായി. കുറ്റം പറഞ്ഞിട്ട് കാര്യമില്ല, കിട്ടുന്ന തുട്ടിന്‍റെ കനം നോക്കിയേ ഇന്ത്യന്‍ കുട്ടികള്‍ കളിക്കൂ. അല്ലെങ്കില്‍ ആ ഐ.പി.എല്ലൊന്നു നോക്കിക്കേ. അങ്ങിനെ കളിക്കണമെങ്കില്‍ അതുപോലെ കാശു കിട്ടണം. അല്ലെങ്കില്‍ ഉമ്മാ വഴക്കു പറയും.